Rusletur Sagvåg

Måndag 24. august kl 17.30 er tida for neste RUSLETUR.

Parkering ved / rundt det gamle Aker Elektro-bygget i Podlen.

Etter innleiande orientering om Podlen-området, ruslar me bortover langs Vass-Podlen. Kanskje ser me restar av kaianlegget der? Så stig me forbi kryssa til Fløytet og Nilsahaugen, med det gamle bakeriet til Clausen. Vidare forbi noverande bensinstasjon og Åsheim, mot Skjepavikjo. Ser me restar av togskinnene? Eller etter andre industriaktivitetar? Til dømes båtbyggjing? Der me gjer stopp vert lokalsoga sett i fokus.

Me rundar så bortover mot det gamle ferjekai-området. Der er det ei ualminneleg rik lokal handels- og skips- og industrisoge. Spora går heilt attende til 1600-talet. Mykje, kanskje det meste, er borte no. Men frå kunnige lokalsogeforteljarar vil me få høyra og gjenoppleva det unike miljøet i Sagvågen. Veit du forresten kva Sagvåg heitte i gamle dagar? F….…….. Sjølvsagt vert det mykje spanande om korleis to-løpselva frå Storavatnet ned gjennom Einarsdalen har gitt grobotn for svært så ulike drifter opp gjennom hundreåra.

Så går ruslinga oppover Sagvågsbrekko. Der får me gjenoppfrisking av den interessante og mangslungne forretningssoga. Alle har vel gode minner frå Klara Ludvigsen sitt supermarknad og dei andre forretninga på rekke og rad?

Me vil også sjå og høyra på det nye som kjem. Er Sagvåg den nye in-staden no?

Nytrukken kaffi og noko smakfullt å bita i får me avslutningsvis på Sagvågs Bistro, i enden av forretningsbygget vis-a-vis Gruo Pub. Der vil fleire ha innslag, alle med historisk vinkling på den vidgjetne og velsmakande Rundstykkjebygdo.

Velkomne alle som ein.

Helsing styret i Stord sogelag.